Սեպտեմբերը սկսվել է, իսկ դրա հետ վերադառնում է նաև դպրոցական տրամադրությունը։ Այդ առիթով POP անկյունը հավաքել է 10 հայկական ֆիլմ ու սերիալ, որոնց պատմությունները տարբեր կերպ կապված են դպրոցի, պատանեկության, ընկերության, սիրո և երիտասարդական կյանքի հետ։

‍

Ընտրանիում տեղ են գտել տարբեր ժանրերի ու ժամանակաշրջանների նախագծեր՝ կատակերգություններից ու պատանեկան դրամաներից մինչև մյուզիքլ և բարոյահոգեբանական դրամա։

‍

1. «Ոսկե դպրոց»

Սիթքոմի գլխավոր հերոսը՝ Ռոբերտը, ազատ արձակվելուց հետո աշխատանքի է անցնում դպրոցում՝ որպես պատմության ուսուցիչ։ Նրա նպատակը նախկինում թաքցրած ոսկին գտնելն է, սակայն նոր աշխատանքը, դպրոցի առօրյան և սիրային պատմությունը խառնում են նրա ծրագրերը։

‍

2. «Հրեշտակների դպրոցը»

Սերիալը պատմում է ավագ դպրոցի աշակերտների առօրյայի, սիրո և հարաբերությունների մասին։ Հերոսների պատմություններում տեղ են գտել նաև սերնդային հակասությունները, ուսուցիչների ու աշակերտների հարաբերությունները և երիտասարդների շրջանում հանդիպող սոցիալական խնդիրները։

‍

3. «Էլենի օրագիրը»

Պատանեկան դրամատիկ սերիալի կենտրոնում Էլենը, Մաքսը, Լևոնը և Սառան են։ Նոր դպրոց տեղափոխված Էլենն ու Լևոնը հայտնվում են նոր միջավայրում, որտեղ նրանց սպասվում են ընկերության, հակամարտությունների, սիրո և ընտանեկան խնդիրների հետ կապված փորձություններ։

‍

4. «Հատուկ դասարան»

Սերիալը կենտրոնանում է դեռահասների ներաշխարհի, դպրոցական առօրյայի և հասակակիցների հետ հարաբերությունների վրա։ Հերոսների պատմությունները նաև անդրադառնում են ընտանեկան խնդիրներին և ծնողների ու երեխաների հարաբերությունների ազդեցությանը դեռահասների կյանքի վրա։

‍

‍

5. «Վերջին ուսուցիչը»

Վարդգես Պետրոսյանի համանուն վիպակի հիման վրա նկարահանված սերիալի գլխավոր հերոսը՝ Վահան Մամյանը, նոր ուսուցիչ է, որը կարողանում է հասնել դժվար դաստիարակվող աշակերտների սրտերին և հասկանալ նրանց ներաշխարհը։ Պատմության կենտրոնում ուսուցիչ-աշակերտ հարաբերություններն են, սերնդային հակասություններն ու մարդկային արժեքները։

‍

6. «Մի անգամ դպրոցում»

Խելացի, բայց սովորելու հանդեպ առանձնապես հետաքրքրություն չունեցող Տիգրանը հաճախ է հայտնվում տարբեր պատմությունների կենտրոնում։ Նրա կյանքը փոխվում է, երբ դպրոցը կանգնում է փակման վտանգի առաջ։

‍

7. «Կորած օրագիրը»

Վարդգես Քալանթարյանի և Մուշեղ Բաղդասարյանի համանուն վեպի հիման վրա նկարահանված 16 մասից բաղկացած հեռուստասերիալը պատմում է ավարտական դասարանի աշակերտների բարդ փոխհարաբերությունների, ներաշխարհի և դեռահասների խնդիրների մասին։ Պատմությունը կառուցված է օրագրային ոճով՝ պատանիների մտքերի, ապրումների ու առօրյայի միջոցով։

‍

8. «Եռաչափ սեր»

Երիտասարդական սիրո և ընկերության մասին պատմության կենտրոնում սիրային եռանկյունին է։ Հերոսները բախվում են զգացմունքների, հարաբերությունների և կյանքի բարդ ընտրությունների հետ։

‍

9. «Նվագախմբի երեխաները»

Մյուզիքլի գործողությունները զարգանում են երևակայական երաժշտական դպրոցում։ Հերոսները հայտնվում են տարբեր զվարճալի ու խնդրահարույց իրավիճակներում, որոնց հաղթահարումը պահանջում է թիմային աշխատանք, հնարամտություն և կամքի ուժ։

‍

10. «Կրկին դպրոց»

Լևոնը ցանկանում է կրկին արժանանալ երեխաների վստահությանն ու սիրուն։ Հնարավորություն ստանալով 20-25 տարով երիտասարդանալ՝ նա հայտնվում է այն դպրոցում, որտեղ սովորում են իր երեխաները։

‍