Սեպտեմբերի 24-ին «Կինոմոսկվա» կինոթատրոնում կայացավ «Մեկ in մեկ» նոր կատակերգական ֆիլմի պրեմիերան։ Երեկոյի համար կինոթատրոնի մուտքն ամբողջությամբ ձևավորվել էր հարսանեկան արարողության ոճով՝ թեմատիկ դեկորացիաներով և երաժշտությամբ։

‍

Պրեմիերային ներկա էին ֆիլմի դերասանական ու ստեղծագործական կազմը, ինչպես նաև դերասաններ, երգիչներ, բլոգերներ և շոու բիզնեսի այլ ներկայացուցիչներ։ Երեկոյի ընթացքում ֆիլմի դերասաններ Ռոբերտ Մարտիրոսյանն ու Գոհար Ավետիսյանը հյուրերին ողջունեցին «Կինոմոսկվա»-ի պատշգամբից։ Այնուհետև Մարտիրոսյանը, շարունակելով հարսանեկան թեման, հյուրերի ուղղությամբ ծաղկեփունջ նետեց՝ կատակելով, որ այն բռնողը կնկարահանվի հաջորդ ֆիլմում՝ գլխավոր դերում։

‍

«Մեկ in մեկ»-ի պատմության կենտրոնում դերասան Արամն է, որն ունի երգիչ Արկադի Դումիկյանին մեկին մեկ նմանակելու բացառիկ տաղանդ։ Ֆինանսական խնդիրների բախված Արամը և նրա ընկերները՝ պրոդյուսեր Լևոնն ու դիմահարդար Գոհարը, որոշում են այդ նմանությունը վերածել շոու բիզնեսի՝ ստեղծելով Դումիկյանի կատարյալ կրկնօրինակը։ Միայն թե իրական Դումիկյանը նրանց ծրագրից տեղյակ չէ։

‍

Դերասանական կազմում են Արկադի Դումիկյանը, Գոհար Ավետիսյանը, Զիրոյանը, Ռոբերտ Մարտիրոսյանը, Մկրտիչ Արզումանյանը, Սոնա Շահգելդյանը և Թամարա Պետրոսյանը։

‍

Ֆիլմի բեմադրող ռեժիսորը Դավիթ Բաբախանյանն է, սցենարի հեղինակները՝ Աշոտ Աբրահամյանը, Ռուբեն Ջաղինյանն ու Դավիթ Բաբախանյանը։ Պրոդյուսերն Արման Միտոյանն է, գլխավոր պրոդյուսերը՝ Ռուբեն Ջաղինյանը։ Ֆիլմը Sharm Holding-ի և Mitoyan Production-ի համատեղ նախագիծն է։

‍

POP անկյունը ներկա էր «Մեկ in մեկ» ֆիլմի պրեմիերային և ներկայացնում է կադրեր երեկոյից։

‍

‍Լուսանկարները՝ Սոնա Հովհաննիսյանի / POP անկյուն