Մրցույթը հյուրընկալվել է Ալեքսանդր Սպենդիարյանի անվան օպերայի և բալետի ազգային ակադեմիական թատրոնում՝ Արամ Խաչատրյանի ծննդյան օրը։
Միհալ Ստոչելը կատարել է Միկոլայ Մայկուսիակի ակորդեոնի համար գրված դասական կոնցերտը։ Երկրորդ տեղը զբաղեցրել է Լատվիայի ներկայացուցիչ Սոնյա Միսինյանը՝ ներկայացնելով Էմանուել Սեժուռնինի «Կոնցերտ մարիմբայի և լարայինների համար» ստեղծագործությունը։
Հայաստանի պատվիրակ Էլեն Վիրաբյանը հանդես է եկել Արամ Խաչատրյանի «Ջութակի կոնցերտ»-ով և զբաղեցրել երրորդ տեղը։
Այս տարվա մրցույթին մասնակցել են երիտասարդ երաժիշտներ Հայաստանից, Բելգիայից, Կիպրոսից, Չեխիայից, Գերմանիայից, Լատվիայից, Լեհաստանից, Պորտուգալիայից, Սերբիայից, Շվեդիայից և Շվեյցարիայից։ Մասնակիցները հանդես են եկել Հայաստանի ազգային ֆիլհարմոնիկ նվագախմբի նվագակցությամբ, իսկ համերգը ղեկավարել է նվագախմբի գեղարվեստական ղեկավար և գլխավոր դիրիժոր Էդուարդ Թոփչյանը։
Մրցույթի հաղթողը որոշվել է միջազգային ժյուրիի քվեարկությամբ։ Ժյուրիի կազմում ընդգրկված էին գերմանացի դիրիժոր Ջուլիեն Սալեմկուրը, իսպանացի ֆլեյտահար Էդուարդ Վելմարը, Լոնդոնի սիմֆոնիկ նվագախմբի դիրիժոր Ռոման Սիմովիչը և հայ թավջութակահար Նարեկ Հախնազարյանը։
«Պատանի երաժիշտների դասական Եվրատեսիլ»-ում Հայաստանը առաջին անգամ ներկայացվել է 2012 թվականին, երբ մրցույթին մասնակցել էր քանոնահար Նարեկ Կազազյանը։ Երկրորդ մասնակցությունը գրանցվել է 2024 թվականին՝ հոբոյահար Հայկ Հեքեքյանի մասնակցությամբ։
«Դասական Եվրատեսիլ 2026»-ն անցկացվել է «Հայաստան․ վայր, որտեղ դասական երաժշտությունը միավորում է» կարգախոսի ներքո։ Մրցույթի հիմքում եղել են հայ կերպարվեստի և դասական երաժշտության լավագույն նմուշները, իսկ միջոցառումը հեռարձակվել է Հանրային հեռուստաընկերության ուղիղ եթերով։
Լուսանկարները՝ Հայաստանի հանրային հեռուստաընկերության
