Շուտով հանդիսատեսի դատին կհանձնվի Yerevan National-ի «Հերոսների ժառանգությունը» նոր վավերագրական շարքը, որը պատմում է հայ հերոսների կյանքի, արժեքների և ճակատագրական ընտրությունների մասին։

Նախագիծը ոչ թե պատերազմի տարեգրություն է, այլ պատմություն մարդկանց մասին՝ նրանց մանկության, ընտանիքի, երազանքների և այն ճանապարհի, որը նրանց հասցրել է պատմական որոշումների։

Յուրաքանչյուր սերիա նվիրված է մեկ հերոսի կյանքին։ Շարքի առաջին թողարկումը պատմում է ազգային հերոս Մոնթե Մելքոնյանի մասին և հասանելի կլինի Kinodaran հարթակում հունիսի 12-ից։

«Հերոսների ժառանգությունը» համատեղում է երկու ձևաչափ՝ վավերագրական և գեղարվեստական։ Վավերագրական հատվածում ներկայացվում են հերոսների կենսագրությունները, արխիվային նյութերը և հարազատների հիշողությունները, իսկ գեղարվեստական հատվածները ստեղծվել են պատմությունների գաղափարներն ու թեմաները ավելի խորությամբ բացահայտելու համար։

Նախագծի սցենարի հեղինակն, ռեժիսորն ու մոնտաժողը Իսահակ Ալեքսանդր Կարսլյանն է։ Գլխավոր դերում հանդես է գալիս Հարություն Սարգսյանը, իսկ դերասանական կազմում ընդգրկված են նաև Դավիթ Ոսկանյանը, Վարդգես Ղազարյանը և այլ դերասաններ։

Ստեղծողների խոսքով՝ շարքը պատմություն է հայրենիքի հանդեպ սիրո, ընտանիքի, պարտքի և հիշողության մասին՝ մի ժառանգության, որը շարունակում է ապրել սերունդների սրտերում։

‍

Լուսանկարները՝ Yerevan National-ի

‍