Միջազգային Deadline հրատարակությունը հայտնում է, որ նոր «Ոդիսևս» (Odysseus) սերիալը մասամբ կնկարահանվի Հայաստանում։

Նախագիծը պատրաստվում է հունական Tanweer ընկերության, ամերիկյան Tectonic նորաստեղծ պրոդյուսերական լեյբլի և ամերիկա-հայկական USATV ընկերության համագործակցությամբ։ Սերիալի նկարահանումները նախատեսվում է սկսել 2027 թվականի սկզբին՝ Հունաստանում և Հայաստանում։

Նախագծի շոուրանները և գործադիր պրոդյուսերներն են Կարլ Գայդյուսեկը, Ջորդան Դայքստրան և Շոն Ֆինեգանը։ Գայդյուսեկը նախկինում աշխատել է նաև Stranger Things սերիալի առաջին եթերաշրջանի վրա։

Սերիալի ռեժիսորը Ռոել Ռեյնենն է, որը հայտնի է այնպիսի նախագծերով, ինչպիսիք են Black Sails, Washington, Halo և Wu Assassins։

‍

‍

Սերիալը պատմելու է Ոդիսևսի պատմությունը՝ ներկայացնելով այն ոչ թե առասպելական, այլ պատմական և իրատեսական մոտեցմամբ։ Ըստ ստեղծագործական թիմի՝ նախագիծը կենտրոնանալու է Բրոնզի դարի իրական աշխարհի, պատերազմների, դավաճանությունների և մարդկային հարաբերությունների վրա՝ փորձելով բացահայտել այն պատմական իրադարձությունները, որոնք հետագայում հիմք են դարձել Հոմերոսի «Ոդիսական» էպոսի համար։

Հեղինակները նշում են նաև, որ, եթե առաջին եթերաշրջանը հաջողի, նախագծի շուրջ նախատեսվում է ձևավորել ընդլայնվող սերիալային աշխարհ։