Երգչուհի Անահիտ Հակոբյանը պատրաստվում է ներկայացնել իր նոր՝ «Նուբար» երգը, որի թողարկումը նախատեսված է այս աշնանը։ POP անկյան հետ զրույցում արտիստը բացահայտել է առաջիկա ստեղծագործության առաջին մանրամասները՝ անդրադառնալով դրա երաժշտական ուղղությանը, ստեղծման գաղափարին և նախատեսվող տեսահոլովակին։

‍

Հակոբյանի խոսքով՝ «Նուբար»-ը երկարատև ստեղծագործական դադարից հետո իր առաջին աշխատանքն է, որով մեկնարկում է երաժշտական գործունեության նոր փուլը։

«Թեև հստակ օրը դեռևս անակնկալ եմ պահում, այն ունկնդրի դատին կհանձնվի այս աշնանը։ Երկարատև ստեղծագործական դադարից հետո սա իմ առաջին «բերքն» է՝ մի աշխատանք, որով ազդարարվում է իմ երաժշտական ուղու նոր փուլի (New Era) սկիզբը»,- նշել է երգչուհին։

‍

‍

Նոր ստեղծագործությունը էթնո-փոփ ժանրում է՝ հայկական ազգային և էթնիկ երաժշտական ակունքների ու ժամանակակից հնչողության համադրությամբ։ Անդրադառնալով երգի ստեղծագործական ուղղությանը՝ Հակոբյանն ընդգծել է նաև աշխատանքի հուզական նշանակությունը։

«Սա մի աշխատանք է, որի մեջ շատ ջերմություն ու հոգի է դրված, և հավատացած եմ, որ այն արագորեն իր արձագանքը կգտնի մարդկանց սրտերում»,- ասել է արտիստը։

‍

«Նուբար»-ի թողարկումը կուղեկցվի նաև տեսահոլովակով, որի ստեղծման աշխատանքներն արդեն ակտիվ փուլում են։ Երգչուհու խոսքով՝ թիմի համար առաջնային է երաժշտության տրամադրությունն ու էներգիան տեսողական լեզվով ամբողջական փոխանցելը։

«Մեզ համար շատ կարևոր է, որ տեսողական պատկերը լիարժեք փոխանցի այն տրամադրությունն ու էներգետիկան, որը դրված է երաժշտության հիմքում»,- հավելել է Հակոբյանը։

‍