Դերասան Սամվել Թադևոսյանն ու ռեժիսոր Շողակաթ Վարդանյանն ընդգրկվել են Եվրոպական կինոակադեմիայի նոր անդամների ցանկում։

Այս տարի կինոակադեմիան համալրվել է աշխարհի 50 երկրից 640 մասնագետներով, որոնցից երկուսը Հայաստանի ներկայացուցիչներ են։ Ներկայում ակադեմիան միավորում է շուրջ 5700 կինոգործիչների՝ 60 երկրից։

Լուրը հաստատելուց հետո Շողակաթ Վարդանյանը սոցիալական ցանցերում շնորհակալություն է հայտնել հրավերի համար՝ այն անվանելով մեծ պատիվ և պատասխանատվություն։

Վարդանյանը միջազգային ճանաչում է ձեռք բերել «1489» վավերագրական ֆիլմով, որը պատմում է 44-օրյա պատերազմում զոհված իր եղբոր՝ Սողոմոնի պատմությունը։ Ֆիլմը 2023 թվականին արժանացել է Ամստերդամի IDFA փառատոնի «Լավագույն ֆիլմ» և FIPRESCI մրցանակներին, իսկ 2024 թվականին հաղթել է նաև Հռոմի վավերագրական ֆիլմերի միջազգային փառատոնում։