Հայաստանը ներկայացնող երգչուհի Ֆլորա Բիչախչյանը հաղթել է «Նոր ալիք 2026» միջազգային մրցույթում, որի եզրափակիչ մրցութային փուլը կայացել է օգոստոսի 23-ին Կազանում։

‍

Մրցույթի եզրափակչում հաղթանակի համար պայքարել է 12 մասնակից՝ չորս երկրից։ Հաղթողի մասին բեմից հայտարարել է ժյուրիի նախագահ, Ռուսաստանի ժողովրդական արտիստ Իգոր Կրուտոյը՝ Ֆլորա Բիչախչյանին բնութագրելով որպես բարձր վոկալային վարպետությամբ արտիստ։

‍

Հաղթանակից հետո Բիչախչյանը խոստովանել է, որ չէր սպասում առաջին հորիզոնականին՝ նշելով, որ մինչ մրցութային նախագծերում երբեք մրցանակային տեղ չէր զբաղեցրել։ Երգչուհու խոսքով՝ «Նոր ալիք»-ին մասնակցությունն իրեն շատ ավելին է տվել, քան կարող էր պատկերացնել։

‍

Մրցույթի ժյուրին, որի կազմում ընդգրկված էին Իգոր Կրուտոյը, Իգոր Մատվիենկոն, Ֆիլիպ Կիրկորովը, Իգոր Նիկոլաևը, Լոլիտան, Ալսուն և այլ երաժշտական գործիչներ, ելույթները գնահատել է 10-բալանոց համակարգով։

‍

Ֆլորա Բիչախչյանը նախկինում մասնակցել է Голос-10 նախագծին՝ հանդես գալով Դիմա Բիլանի թիմում, դարձել է Ну-ка, все вместе! նախագծի և «Եվրատեսիլ-2025»-ի Հայաստանի ազգային ընտրության եզրափակիչ փուլի մասնակից։

‍

Բիչախչյանի հաղթանակը Հայաստանի համար «Նոր ալիք»-ում հինգերորդն է։ Մինչ այս մրցույթում հաղթել են Սոնա Շահգելդյանը (2010), Էռնա Միրը (2017), Սարո Գևորգյանը (2021) և Անահիտ Հակոբյանը (2024)։

‍