Ամերիկյան կինոարվեստի և գիտության ակադեմիան հրապարակել է 2026 թվականին անդամակցության հրավեր ստացած 529 կինոգործիչների և ոլորտի ներկայացուցիչների ցանկը։ Հրավիրյալների թվում կան նաև Հայաստանի և հայկական սփյուռքի ներկայացուցիչներ։

Հայաստանից Ակադեմիայի կինոօպերատորների ճյուղ հրավիրվել է կինոօպերատոր և լուսանկարիչ Սուրեն Թադևոսյանը։ Պաշտոնական ցուցակում նրա անվան կողքին նշված են «Յաշան ու Լեոնիդ Բրեժնևը» և «Մեդալի հակառակ կողմը» ֆիլմերը։ Թադևոսյանը երկար տարիներ աշխատել է ինչպես խաղարկային, այնպես էլ վավերագրական կինոյի ոլորտում՝ Հայաստանում և արտերկրում։

Նոր հրավիրյալների թվում է նաև հայկական ծագմամբ մենեջեր և պրոդյուսեր Ալին Քեշիշյանը, որը ընդգրկվել է դերասանների ներկայացուցիչների ուղղությամբ։ Քեշիշյանը հայտնի է Հոլիվուդի դերասանների և ստեղծագործողների հետ իր բազմամյա աշխատանքով։

Մարքեթինգի և հանրային կապերի ուղղությամբ հրավեր է ստացել Ջոշ Հարությունյանը՝ Divergent PR ընկերության ներկայացուցիչներից մեկը։ Նա կինոարդյունաբերության մեջ հայտնի է որպես փիար-մասնագետ և մրցանակային արշավների ռազմավար։

Ակադեմիայի կարճամետրաժ ֆիլմերի բաժնում ընդգրկվել է նաև Նատալի Մուստեատան՝ Two People Exchanging Saliva կարճամետրաժ ֆիլմի համահեղինակը։ Մուստեատան նախկինում անդրադարձել է իր հայկական արմատներին՝ նշելով, որ մայրական կողմից իր ընտանիքը հայկական ծագում ունի։

‍

‍

‍

Ակադեմիայի տվյալներով՝ 2026 թվականի հրավիրյալների ցանկում ընդգրկված են «Օսկար»-ի 95 հավակնորդներ, որոնցից 21-ը մրցանակակիրներ են։ Հրավիրյալների 53 տոկոսը ներկայացնում է ԱՄՆ-ից դուրս գտնվող 60 երկիր և տարածք։

Միաժամանակ Ակադեմիան ընդգծում է, որ հրավեր ստանալը դեռևս չի նշանակում անդամակցություն։ Անդամ կդառնան միայն այն մասնագետները, որոնք պաշտոնապես կընդունեն ստացված հրավերը։

‍